Survey-alerts-Britain-US-on-Covid-actions-Top-countries-changed-strategy

Survey-alerts-Britain-US-on-Covid-actions-Top-countries-changed-strategy

కోవిడ్ చర్యలపై బ్రిటన్, అమెరికాలను హెచ్చరించిన సర్వే.. వ్యూహం మార్చిన అగ్ర దేశాలు

ప్రపంచంపై విరుచుకుపడుతోన్న కరోనా మహమ్మారిని అరికట్టడానికి అన్ని దేశాలూ తీవ్రంగా శ్రమిస్తున్నాయి.

దాదాపు 2 లక్షల మంది ఈ మహమ్మారి బారినపడ్డారు.

సుమారు 8 వేల మంది ప్రాణాలు కోల్పోయారు.

కరోనా వైరస్‌కు ప్రధాన కేంద్రమైన చైనాలో ఆ వ్యాధి కాస్త తగ్గుముఖపట్టినా… ప్రస్తుతం ప్రపంచంలోని 160కిపైగా దేశాలకు వ్యాపించింది. కరోనా దెబ్బకు ఇటలీ, ఇరాన్, స్పెయిన్‌లు నిలువునా వణికిపోతున్నాయి.

ఇజ్రాయెల్‌లో అయితే, గడిచిన 24 గంటల్లో కోవిడ్ 19 కేసుల సంఖ్య 40 శాతం మేర పెరిగింది. దీంతో, ప్రజలను ఇళ్ల నుంచి బయటకు రావద్దని ప్రభుత్వం కోరింది.

మంగళవారం ఒక్క రోజే 90 కేసులు నమోదుకాగా, మొత్తం బాధితుల సంఖ్య 427కి చేరినట్టు ఇజ్రాయెల్ ఆరోగ్య మంత్రిత్వ శాఖ బుధవారం ప్రకటించింది.

అయితే, ఇప్పటి వరకూ కరోనా కారణంగా ఇజ్రాయెల్‌గానీ, పాలస్తీనా ప్రాంతంలో గానీ ఎవ్వరూ ప్రాణాలు కోల్పోలేదు.

పాలస్తీనాలో మొత్తం 44 కేసులు నమోదయ్యాయి. జనసాంద్రత అధికంగా ఉన్న గాజాలో ఎలాంటి కేసులు నమోదుకాలేదు.

అటు, పాకిస్థాన్‌లో కరోనా వైరస్ కేసుల సంఖ్య 245కి చేరింది. గడిచిన 24 గంటల్లో అక్కడ 60కిపైగా కొత్త కేసులు నమోదయ్యాయి.

మంగళవారం ఉదయం నుంచి బుధవారం ఉదయం వరకు భారత ఉప-ఖండంలో మొత్తం 482 మందికి కరోనా వైరస్ సోకినట్టు నిర్ధారణ అయ్యింది.

మరోవైపు, కరోనావైరస్‌పై పోరాటంలో బ్రిటన్‌ తన విధానాన్ని మార్చుకుంది.

కొవిడ్‌-19కు అడ్డుకట్ట వేసేందుకు కఠినమైన నిర్ణయాలు తీసుకుంది.

ప్రజలు బయట తిరగడంపై ప్రధాని బోరిస్‌ జాన్సన్‌ ఆంక్షలు విధించారు.

70ఏళ్లు పైబడి అనారోగ్యాలతో ఉన్న వారు ఇళ్లకే పరిమితం కావాలని ఆయన సూచించారు. ఇప్పటి వరకు యూరప్‌లోని మిగిలిన దేశాలతో పోలిస్తే బ్రిటన్‌లో ఆంక్షలు తక్కువగా ఉన్నాయి.

ప్రఖ్యాత ఇంపీరియల్‌ కాలేజ్‌ ఆఫ్‌ లండన్‌కు చెందిన మ్యాథమెటికల్‌ బయోలజీ ప్రొఫెసర్‌ నీలఫెర్గ్యూసన్‌ ఇటీవల ఒక నమూనా సర్వే నిర్వహించారు.

కరోనా తీవ్రత అధికంగా ఉన్న ఇటలీ నుంచి సేకరించిన సమాచారం ఆధారంగా నిర్వహించిన సర్వేలో భయంకర విషయాలను వెల్లడించారు.

ఈ మహమ్మారిని 1918లో ప్రబలిన స్పానిష్‌ ఫ్లూతో పోల్చిన సర్వే.. ఎటువంటి ఉపశమన చర్యలు తీసుకోకుండా ఇదే పరిస్థితి కొనసాగితే బ్రిటన్‌లో 5 లక్షల మంది.. అమెరికాలో 22 లక్షల మంది ప్రజలు ప్రాణాలు కోల్పోవాల్సి వస్తుందని హెచ్చరించారు.

అంతేకాదు, అనారోగ్యంగా ఉన్నవారిని మాత్రమే ఇళ్లకు పరిమితం చేసి, ఆంక్షలు విధించకపోయినా .. 2,50,000 మంది చనిపోయే ప్రమాదం ఉందని పేర్కొన్నారు.

ఇప్పటికే పలు సందర్భాల్లో ఆరోగ్య వ్యవస్థలు విఫలమైన నేపథ్యంలో ఈ ఫలితాలు వస్తాయని పేర్కొంది.

అటు, దక్షిణాఫ్రికాలో మొత్తం కోవిడ్ బాధితుల సంఖ్య 85కి చేరుకోగా, మంగళవారం ఒక్క రోజే 65 కేసులు నమోదయ్యాయి.

దీంతో ఆ దేశంలో ఆర్ధిక అత్యవసర పరిస్థితిని ప్రకటించారు.